Tanü Dimapur nung Excise purtemi pua yudena aliba yi aser ganja rongdokba sentong nung Excise Commissioner, Wb. Maongwati Aier (achijilen nungi tasembuba) den SDPO, Niuland, Khalo aser tangar yimten aser lokti tentet nung lenirtemi shilem agia raksaa endokba noksa nung angur. February 09, 2011.
Dimapur, Feb. 09 : Tanü Brehostibar nü Dimapur nung Excise purtemi tamalen rakzüka ayuba yi aser ganja sen crore 2.80 jenjang raksaa endokogo. Item ozüngi memelaba mechimeyongtsütem raksaa endokba sentong nung Excise Commissioner, Wb.Maongwati Aieri anir police aser lokti tentet lenirtem dena liasü.
Tanü raksaa endokba mechimeyongtsütem rongnungji sen crore ana shi jenjang yi bottle 20,828 liasü. Itemji taoba ita pongo tsüngda apuba liasü aser item ozüngi memelaba machimajemtsü abener ajak agi nisung 154 puogo aser okadak ken o 144 agüja lir. Item ozüng raksartem dang nungi senchi achiba sen ajak agi sen lakh asem ser meyirijang metsür ti noklang pongo sorkar senpongi aruogo ta Excise department osang ajanga metetdaktsü.
Tanü amato tamalena October 12, 2011 nü Dimapur nung Excise purtemi yi bottle 7335 raksaa endoka liasü.
Ano, tanü kasa mapang nung sen lakh 80 shi jenjang ganja seret 3105 rongdoka endok. Itemji yaküm küm March ita nungi taküm 2012 küm January ita tashi nung apubatem liasü. Item ozüngi memelaba oset abener nisung 7 apu aser gari ana rakzüka ayu. Yaküm 2011 küm March ita nung Excise purtemisa ganja seret 519 rongdoka endoka liasü.
Tanü iba sentong nung jembidang, Excise Commissioner, Wb.Maongwati Aier-i ashiba agi, Nagaland nung yi mayoktsü ozüng zünga aliba ya magientsüla, iba ozüng ya takok ngua amshitettsü lenmang lir.
Nagaland nung yi mayoktsü ozüng zünga aliba ya agienra, Naga nunger aikati anogo piyong yi jema amongtsü aser nisung aika yi pur kümer asütsü. Asenok yimten nüjiso nguaka, asenok ajak yi lar kümer lira, yimten nüjisoji kechi asütsü, Naga nunger ajak yi lar kümer yimsüsür malitsü ta Maongwati-isa metetdaktsü.
Yi ya asen loktiliba nem timtem agütsür ka lir aser nübortem asoshi tsükchir lir, anungji Nagaland nung yi mayoktsü aser majemtsü asoshi nübortem longjemer yi tongpang anema nokdaktsüla ta paisa ashi.
Excise Commissioner-isa ashiba agi, Ministry of Home Affairs, Defence Ministry aser DG Narcotic Control Bureau of India ajanga Nagaland nung Excise purtem mapa tashi itta inyakdaktsütsü atema nüngdakba osettem agütsütsü mulunga lir aser itemji aru atar. Kodang item osettemji arua tongdir, küm ka tsüngda Excise nung inyakertem inyakyim tajungba akümtsü ta paisa ashi.
Excise nung inyakertem mapa nung takok ngua inyaktsü asoshi mapang mapang shia pai state DGP aser Home Commissioner den ajurutepa nüngdak jembidagi aser sorkari excise purtem nem ozüng raksartem anema raratsü asoshi prangpong agütsü nungbo, mapa kanga takok ngua inyaktettsü ta Wb.Moangwatiisa ashi.
Nagaland nung yi mayoktsüba ozüng “Nagaland Total Prohibition Act 1989″ ya arogo nungertem ajanga latetdaktsüba ozüng ka asünungji, iba ozüng ya takok ngua aotsü asoshi akok tashi arogoi shilem agitsüla aser arogo niung akok tashi lanurtemi shilem agitettsüsa sentong yanglutsüla ta paisa metetdaktsü.
Wb.Maongwatiisa ashiba agi, yi ayokertemi yi mayoktsüsa arogoi yi ayokertem dang mapa inyaktsü lenmang sayutsüla, parnokji training tapu balalai yoktsüla, iba jagi yi ayokertema teyari angutsü aser yi ayokba mapatema nokdangtettsü.
School nung tanurtemi yi ajemba aser drugs achiba ajanga timtem aser takoksa ajuruba metettsüsa item indangji züngdaktsütsüsa Education department-i anepalua inyak nung jungla ta Maongwatiisa metetdaktsü.
Nagaland nung yi aser ozüng memelaba mozümora ayokba aser achiajemba anema inyaktsüba mapa ya Excise department purtem kija mapa masü aka ajak khuret lir, anungji iba temenen mapatem ya loktiliba nungi agientsüsa nübortemia shilem agia inyaktsüla ta Excise Commissioner-isa ayongzük.
Paisa Excise nung inyakertemi mapa takok ngua inyakba atema tenüngsang agütsü aser mulngtet telok balalai shilem agia yaritepba asoshi pelaba metetdaktsü.
Iba kasa sentong nung Excise & Prohibition, Superintendent, Wb.Pitongshe Sangtami ozüngi memelaba machimajemtsü ayokba nokdangtettsüsa takok ngua len aniba atema Excise Commissioner dang pelaba metetdaktsü. Paisa Excise nung inyakertem, CO 29 AR, CO 20 AR, DMC, district administration aser police purtem ajaki yaritepba asoshi pelaba metetdaktsü.
