E.U Ambassador-temi tanü Kohima nung Nagaland angh pa alidak  Raj Bhawan nung ajurua noksa agiba ka yangi angur. (May 14, 2012).

Dimapur, May 14 (TYO) : European Union (EU) nungi ambassadors parnok ti shirnok tang Nagaland nung aruagi lir, parnoki tanü Hombarnü Kohima nung Angh aliba kidang Nagaland Angh, Wb. Nikhil Kumar den ajurutepogo.

Par telok nung tanishir, Joan Cravinho-i ashiba agi state nung yimten aser rongsenren jenjang koma ali, ibaji tejangjaba metettsü nükjidong nung parnok aru.

Paisa ashiba agi, India sorkari ‘Look East Policy’ nükjidong yangluba sülen parnoki (E.U. countries) tanga North Eastern Statebo semdangogo.

Tanü Ambassador telok jagi Nagaland Angh den state nung shisaliok dak sentakba tebilemtsütem, yimtenren tebilemtsütem, yimjung maparen aserbo ‘Look East Policy’ dak sentakba maparen koma inyaka aor, item nungji ajemdaker ken o lemtepa jembi.

State nung shisaliokji temaba jenjang nung lir aser lanurtemi All India levels tashi nunga ‘competitive examinations’ nung takok tajung ngudagi, ta Angh-i E.U. Ambassadors den lemsatepogo.

Naga nunger yimtenren tsütsü teti atema yimjung yanglutettsü atema mapang tonga arudagi, ta Angh-isa temulung lemteta metetdaktsü, kechiaser Naga nungertemi yimjung aginer aser iba nungji ajemdaker nüburtem tenüng nung arogotemi ola adoka ayimdendagi, ta paisa shisem.

Tarutsü lanu putu asoshi teti atema yimjung nüngdaker ta Governor-i ashibaji shitak ta Ambassador-temia shiogo.

India sorkari nükjidong yur tenzükba ‘Look East Policy’ nungji Myanmar nungi tenzüka ASEAN linüktem rangben asoshi nükla yur inyaker, ta Wb. Nikhil Kumar-isa ashi.

“Terenlok maparen inyakdang anüolen tsütsü aliba kintema mamadoktsü, kechiaser asenok ajaki alima otsü meteta lir,” ta Angh-i shia iba sensaksemba sentong tembang aser iba mapang, ‘Look East Policy’ inyaka aodang ‘West’ bilemtettsüla, ta Ambassador kati metetdaktsü.

European Union (EU) ambassador aser Nagaland-i aruba EU delegation tekolakba Joao Cravinho-i anir ano Bulgaria nungi Brisian Kirilove Kostova, Czech Republic nungi Milosav Stasek, Finland nungi Terhi Hakala, Hungary nungi Janos Terenyi, Poland nungi Piotr Klodkowski, Slovak Republic nungi Marian Romasik aser Germany nungi Card Meier Klodt ta ambassadors tenet yashi nungi anogo asem atema Kohima nung mongdagi.

Tanü Nagaland University, Kohima Campus, Meriema nung tesayurtem, research scholars aser kaketshirtem den jembidang Joao Cravinho-i ashiba agi shisaliok tsütsü ajak atema tiyongtsüji University asünung, EU linüktem nungi aruba ambassadors tii Nagaland University semdangtsü lemtet.

Sensaksemba mapang pai ashiba agi tarutsü nung Nagaland atema tongtibangtibaji, tebilemtsü arudang ibaji tongteta bener otettsüsa lanurtem renloka kümdaktsütsübaji asütsü.

Iba khuretji idagi Nagaland nung dang masü saka alima ajunga nung lir kechiaser tanga tesemtem nunga iba atemaji tasa junga magütsüteter.

Paisa ashiba agi, EU Universities aser Indian Universities tsüngda amalitepa aruogo aser ibaji takok tajung nguteta odagi. Anungji Nagaland University o European Universities tsüngda tesayurtem aser kaketshirtem asoshi lenmang tajung lapoka maongka tajung bushiteptsü nüngdaker; yamaji asünung dang shisatsü bendentettsü aser lemsateptetsü aserbo temaba jenjang nung researches agitettsü, ta paisa metetdaktsü.

University nung lanutsürtem aika adenshia aliba ngua jangratema bilemba lemsatepdang, European linüktem nungbo lokti nung temelenshi adokdaktsütsü atema tetsürtemi tiyongtsü ser shilem agir, ta Joao Cravinho-isa metetdaktsü.

Parnok Nagaland tonga aruba indang lemsatepdang, “Onok ya New Delhi atema masü India atema aruba Ambassadors lir,” ta Joao-i ashi. Iba lima tulu indang bushitsü atema onok aru, ta paisa shisem.

Tesülen parnokisa assembly complex nung tatartem den ajurutepa sensaksemogo aser iba sentong nung speaker Wb. Kiyanilie Peseyie, ruling, opposition aser state nung aliba tanga political parties nungi MLAs aruagi aden.

EU telokisa Angh aliba kidang Governor Nikhil Kumar aser CM aliba kidang Chief Minister aser cabinet colleagues dena ajurutep.

Parnoki asüng Mongolbar anepdang Kohima Museum, War Cemetery, Kisama aser Khonoma semdangtsü sentong renema lir.

Bendanger linüktem nungi arurtem North East semdangi yoktsü atema MEA-i MHA dang nungi ‘security clearance’ agitsü atema ozüng nung shia lir.

Bulgaria, Czech Republic, Finland, Hungary, Germany, Poland aser Slovakia ta linük tenet nungi ambassadors aser European Union (EU) nungi züngsem kati tang Northeast state semdanger.

Parnoki tanü Hombarnü Nagaland University semdang aser Nagaland Governor, Wb. Nikhil Kumar ajuruogo aser nikongdang Chief Minister, Wb. Neiphiu Rio-i chiyongi jaok.

Kasa osang ajanga ashiba agi, HSRP jenjangji officers-i agütsütsüla saka district shia nungi bill ajak bendener Commissioner office, Nagaland, Kohima nung agütsüba sülen tanaben meyipa agütsütsü (re-imbursed).

Iba dak sentakba kenoji tekaratiba nung obendang agütsütsüla ta MTLT-i Mokokchung Deputy Commissioner dangi züluba takhangba shiti nungji shia liasü.

MTLT-i züluba shiti nungsa, May 7 nü Longsatsür ka dak tashiyim amshia taküm raksatsütsü aser tepsettsü merangba dak sentakba maparen nung aibelensang Laskhman Das mapang shitak nung pua bener arutetba asoshi bangdak pur dang pelaba shisema liasü.

“Ibai ataloker joko hopta ka ajunger saka iba dak sentakba keno kecha balaka jembia aoba mangur, anungji aibelensang anemji tekaraba nung o bendang agütsütsüla aser temerenshiji osang kaket ajanga sangdongtsüla” ta MTLT-isa takhangba ka agütsü.

“Onoki akhangbaji bangdaki shishia agizüktsü ta amanger, kechiyong obendang agütsütsü menubaji ochi obendang agütsütsü memulungba den saku lir” ta MTLT tir aser repsem zülur Imkongsanen aser Yanger Namo-i metetdaktsü.

“Iba keno dak sentakba nung yakta obendang magütsüra, MTLT-i pei mulungba mera kar agitsü aser ibaji inyakdang lendongtsüdong kar danga atalokra, onok khuret masütsü” ta MTLT-i züluba takhangba shiti nungji shia liasü.

Iba takhangba shitiji agütsür külen MTLT lennirtemi osangbenertem den jembiba mapang, “iba kasa lendongji asüng ser yanü ano tanüngba tetsür tanurtem dak ataloktsü menua mali, anungji, item lokti menentsüba maparen anema MTLT-i tatem tashi noktaktsü” ta metetdaktsü.

“Tang tatalokba ya tetsür anema inyakba kisüng masü saka asen lokti anema inyakba aser amokmerenba maparen ka lir” ta parnokisa kanga mepelai ashi.

“Tarutsü nung iba amai atalok nungbo liso nisung süshia mesüra tanga kintem (non-local) süshia shinga danga tai madoktsü aser aibelenerjibo tatem tashi bushitsü” ta MTLT lennirtemisa sashisashia metetdaktsü.

Talisa, “tanga kintem (non-local) kari danga ibala mesükba maksütsü mapa tamajung inyakba putetra, item kinji khuret tulu asütsü” ta parnokisa tekümdangtsü olen ka shiogo.

Iba den ano “tashiyim agi mesüra sen/rongsen amshia puadaktsür mapa tamajung inyakba kar danga putetra parnokjia tai madoktsü” ta MTLT lennirtemisa jangjajangja metetdaktsü.

Osang ka ajanga angazükba agi, iba keno angadangtsü asoshi mapang tajemba agi ita ka mesüra anabosa agitsü.

Tanep MTLT puri May 7 nü atalokba dak sentakba anema Mokokchung Deputy Commissioner nem takhangba shiti agütsüi aodang MTLT lennirtem den ano kiyong balala nungi lanur aikadi meina orr iba shitiji bangdak pur kar nem agütsü. Tanü iba shiti agütsüi aodang Mokokchung D.C aser Superintendent of Police (SP) na prong Mokokchung nung mali asü.

“Temelenshitsü kar nüngdaker aser iba inyakyim nung police-ia tongti shilem agitsüla,” ta osangbener senden ka nung jembidang Gogoi-i ashi.

State nung Maoists telungpurtem aruagi alibaji tebilemtsü ta jembiba mapang chief minister-isa ashiba agi, Assam police nung IGP ka kübok “special cell” ka tekaratiba nung tentettsü.

“Maoists pur adenshibaji tebilemtsü asünung, onoki telungpurtemji anepalutsü atema police nung ‘special cell’ ka lapoktsü,” ta paisa metetdaktsü.

“ULFA mesüra Maoists telungpurtem azüoktsü atema sepaitem nem training tajung balaka agütsütsü nüngdaker,” ta Gogoi-isa metetdaktsü aser backward tesemtem nung kechi südir süaka terenlok maparen inyaktsüla, ta paisa shisem.

“Yimtsüng nung sensakertem aria bilemer amato sayua Maoists purtemi terenlok maliba tesemtem tsütsü temulung yoker. Ibaji melenshidaktsütsüla aser asenoki yimtsüngtem nung terenlok maparen inyaktsüla,” ta paisa metetdaktsüogo.

Tengakhat police station anasa aliba Udalguri yim anasa totzü abenba yinpong nung IED bomb-temji enokja liasü ta Superintendent of Police, Arabinda Kalita-i metetdaktsü.

Osang kar angazükba sülen, tanü nikongtsütsü 5:30 ako meta police-i IED temji bushitepyonga ao aser ngutet.

“IED shiaji seret pungugu liasü aser itemji apok asübo lendong tulu ajurula. Item tepoktsütem raksa endoktsü atema onoki Army dang nungi teyari meshiogo aser Dinjan Army Camp nungi parnok telok ka arutsü” ta Kalita-isa shisem.

Iba tesem nung ano tanga tapoktsütem rema yua alinungbo ta bilemba agi, police temi maneni bushisüngdang südagi.

Iba tesem nung Raktajeet Hazarika aser Jayanta Handique nati  aniba ULFA telungpurtemi kanga bulua maparen inyaker aser parnoki iba totzü abenba yinpong poksatsütsü tasa atong südi ta itdangitertemi parnoki temulung melemi bilemba olen ka sangoktsü.

Superindentent of Ecxcise, Dimapur district L Wati Jamiri ashiba agi, tan May ita anogo 15 tsüngda yi tapu balala bottle 647 Chumukedima check gate aser Dimapur town nung aliba hotel/restuarants ishika nungi apu. Iba sendakba maparen nung nisung 15 apu aser NLTP Act ozüngi ajanga temerenshi agutsüogo.

Yi ajemba ajanga nisung taküm aika raksatsür, anungji iba ozüngi memelaba mapatem nokdangtsü asoshi Excise Superintendent, Wb.L.Wati Jamiri lokti tentet ajak dang kulemi teka amateper yaridaktsüner ta mepishia metetdaktsüogo.

Deobarnü tetsütem anogo amungba nüngtem nung ‘Miss Mokokchung 2011’ Kongru Alis Jamir-i Mokokchung IMDH mozüki aser T.B ward nung shiranga  amunger tetsütem aser mozü kidang inyaker staff tetsü parnok 40 shi nem narojung aser sempetlep bener oa semdangba den tetsü temeim salem o shia liasü. Kr. Alis Jamiri shiranga amunger tetsü ka nem narojung den sempet lep ka agütsüdang tangokba noksa nung angur. (13/5/12 – Sashi Jamir Photo)

“Item peacekeeping missions atema tang sepai 7099 tashi mapa lemzükja lir. UN Peacekeeping Missions mapang India nunger sepai taküm bendanga agütsürtemji nisung 10 lir” ta Lok Sabha nung Defence Minister AK Antony-i ashi.

UN atema peacekeeping mission inyakdang, Congo nung sepai 7, Sudan nung 2 aser Lebanon nung ka asü.

“Item tatalokbatem nung tasür kibong shia nem USD 70,000 temenok agütsüogo” ta Antony-isa shisem.

UN Peacekeeping Missions atema India nunger sepai mapa lemzükja alibaji, Congo nung 3,770 aser South Sudan nung 2,227. Anosa, Observer Missions atema East Timor nung 1, Ivory Coast nung 9 aser Sudan nung ana mapa lemzükja lir.